Asakaa

Asakaa (alijunaiki: saludar) Tü asakaka sutumaa wayuu waneejatü sümuin sukua'ipa suulia sukua'ipa alijuna, na asakünaka naya na antüshiikana natüma na nepialu'ujanakana, jüchikijee nasakünüin aikaletnushii juupuuna wanee luma, asinnushii kepein, uujolu, ekitnushii eküülü, yootuna amanii naya.

Sukua'ipa tü asakaaka natüjain na tepichikana, na jimaliikana, na jimo'onnuukana, na majayuutnuukana motsoyuutnuiwaya naya, eere ne'rüin na napüshikana sünain asakaa kasakalüirua nanain, nepialu'u otta eepunalee naya; ma'aka sa'in sünain alapajaa, yonna, shaitaa, yanama, pa'ünaa, ekawaa sa'u lania jee walaa.

Maka wanaalee amaawaa wanee wayuu asakünüshi ja'itaichi nnojolüin ennajünüin, toololee nia wa'lee, taata, talaüla münüshi otta jierülee shia nii wa'irü, maachon münüsü. Tü wayuuwaaka eesü kamaneewa nama'ana, chi wayuu kamaneekai atüjashi asakaa, erajirashi nia sümaa wayuu.

Na tepichikana ekirajünushii jünain asakaa natumaa natuushi, noushi, nalaüla otta müsia nei, süpüla miyo'uyuupa naya kamaneeinjanain nasaküinjanain otta ayatüinjatüin tü sukua'ipaka wayuu natuma.

Sünainjee tü asakaka eesü ama'anawaa tü kamaneewaaka otta müsia tu e'raajirawaaka. Asakünule wanee wayuu wanaa süintüin sünain wanee kasa, su'napa sünainjee eere shia apütaasü sünüinjatüpa, ee müsüja'a tü e'rajirawaaka.