Aküjalaa jüchiki Wolunka

Naashen naa watuushinukana Taata Male'iwa paala jümaleeiwa'aya ma'i nukumajüin wanee piichi anache'echonshaanasü jüka yotojolo nüsakalajala cha'ya wuna'apüjee jünainjee tü yosu jutsukalüirua, nüchaja'alewolin tü jüsa'ainjatüka otta müsia tü a'ipiisekalü jüpüla jiinnajie tü jutujunaka jümaa jüralaajunaka jüpüla jukumajaainjatüin tü piichika, jüchikajee kettaain nutuma tia naapaaka tü pootshika, nukumajaka wanee wayuu jierü anache'echonshaanasü, Wolunka Jünülia, jüchikajee kettain nutuma nikerotiraka jia paülü'ümüin ma'aka jaa'in wane kasa nukorolo julu'u aishaanain jüma kojutushaanain nutuma. Jiasa wanee ka'i maínma ma'i tü wayuu kaainjarannuukalü, ma'aka jaa'in Pulooi julu'u jünanajaku'u jümaka jünainru'upuna tü piichika jüma jüyakalachonnin tü yotojoloko jietta'ya jüpüla jirüinjatüiruin wanee wayuu julamia, anasüche'echonshaata ma'i yala pa'ülü'ü, jüchiküjee tüya ju'unaka jünain aküja jüchiki tü wayuu jirakalü yala paülü'ü nümüin Juya, yalajee yalaala ke'eketsü naa'in ji'ire nirüin jüpüla niraajüin jia, jakatsa isain nüchiki jüpüla nirüinjatüin jia jüka jamüin süttate'echonsu jümaa anashaanain jukumajia tü pichikat juulia jitnüinjatüin jutuma wayuu kama'ülalüiruwa. Maima tü kasa jülüjayaaka naa'in jüpüla nirüinjatüin jia. Jiasa jo'u wanee ka'i nüsiiyajaaka tü naamainka jüpüla jüitajatüin tü juyaka julu'u mule'ushaanain jia jüpüla jusotuinjatüin tü wuinka julu'upuna tü yotojoloko. Wanaapüna jümaa jüittashaanain tü juyaka eemera'alaasü wolunka julu'u ju'ula, jiasa yalaje yalaala jüshorottaka wanee wuin julu'u jumocho jüpüla ipuworuleeinjatüin jia nutuma Juya, eere jia jümüle'ulaain tü jüle'eka jükalü'ü ka'i, jümaa nnojoluin jütujaain ja'u tü kasa alatakalü jümüin. Jiasa wanee ka'i Taata Male'iwa nirajaaka tü wayuu nukumainkalü jüka pootshi eere nüntüin jünain müle'ushaanain jülee, niasa nia jashichika'aka nia jümüin jaali ipuwoluin jia, nujuitiraka'aka jia yalajee jüma eepünaweere ju'unuin jüka jukuwa'ipa jüpa'apünaa mmaaka. Wolunka ojuittüsü julu'uje tû piichika eejatûle jia paala nutuma Taata Male'iwa jüma mojushaanain jaa'in jaali tû kasa alatakalû jûmuin julu'uje tûra eejatûle jia, jiakalia o'unûsû chaya uuchitû'umuin yalamuin jûralo'umuin tu uuchikat Makuira, yalajee yalaala wanajiraaka jümaa wanee wayuu jierü, jakatsa jian Pulooi jûkûjaka tû kasa alatakalû jûmüin jümüliajaka'aka jaa'in jüma juunejaain jipialu'umuin eere kakalian jia jümaa, yalaala joo jûpula jemeyuluinjatüin jia jipialu'u Pulooi, jemeishiija'aya piamashii tepichi tooloyuu eere kanüliayain naya atumawaa, nûnülia wanee Alenûr otta mataashia Epichikuwa. Yalajee yalaala mule'ushii naa tepichikana semûyûkana. jiasa jûchikaje tûya Pulooi jukulajaapa namaairua jaainjakaka wanee kasa mojusu jûmûin nei naa tepichikana julu'u ju'utaleewolin jaa'in. Joolu'u apûta'alaashi naa tepichikana julu'u melin naya, jiasa jûnainje tûya kasa ainnakalû jûmüin tû neika nainku'ukaka aa'inrua maleeshija'aya waya ma'aka wei jutuma tû wayuuka namaka'irua jüma naluwataain jipialu'ujee Pulooi otta mataashia no'unuin eejenale nala nalaajûnûin nutuma Juya. Muleuyuushija'aya naya yala'ayala eere natüjaain jau tû nakuwai'ipaka jünain apûjawaa, alojoo, otta ayatawaa. Jiasa wanee ka'i Epichikuwa ûrû'üttaka naa'in nûmüin chii nuwalakai Alenur jaali waneein wayuu a'yataishaana, koustuleshi, wayuu atûjûshi nukuwa'ipapala, aisû tû kasa eekalû nûûtpünaa ma'aka jaa'in tû wayuukalûirua, tûra mûrûtkalûirua otta mataasia tû mojuikalûirua, jiasa jo'u wanee kai neemeraka juyuupuna wanee mojui jûnain atunka, jiasa jo'o yalajee yalaala jûka Epichikuwa ûrû'ûttûin naa'in nünain chi nuwalakai naapakaka wanee wunu'u nûliajatû chi nuwalakai jüma nûyaatüin nükü'ütpüna yalajee yalaala watuwo'ushi.