Shira kaa'ula

Shira kaa'ulaa (alijunaiki: sopa de chivo) Shia wane eküülü, aainjüsü sünainjee shi'iruku kaa'ula. Asünüsü sulu'u iita ere ketnolüin, nüka wane alepa. Ainjünüsü eepünalee suka'lia; sünain ekawaa, alapajaa, wayuu eere ayuulin, asüsü shira ka'ula. Tü ekülü makaralu'u jemetüsü ma'i, ka'kasü witamiina B3,B6 je B12, anakalü ma'i sümüin wayuu. Sujuittapa wanee majayülü sulu'ujee suttaa, asitnüsü shira Kaa´ula, süpüla sütamate'erüin saa'in. Müsiaka saa'in wane wayuu jemeyulüin, asitnüsü wane shirachon Ka'ula.

Sukuwa'ipa sülakajaaya

Aapanüsü wanee shikii ka'ula otta jo süsipü,sünainru'u, achotoonusu süka rüi a'lakajünüsü shimiiwa'a palajana, poolotopa shia, ejitünüsü wiirü, ichii, otta müsia palitchon pireewa, ese wayuu ejitakalü roo sa'aka. Müima’aa yaa, eesü wayuu ejitaka waima kasa sa'aka; kuwiita, süpana wunu'u wüitüsü, püla'ana, maiki, kineeya, seita. Nnojolüipa shiain wanee eküülü sümaiwajatü, ayatapaje'e shia jemetüin.