Juriicha
Juriicha / Juriichi (alijunaiki: vísceras de ovejo o chivo fritas con cebo o aceite) shia wanee eküülü, aainjünüsü sünainjee shiyülain sümaa shi'iruku anneerü, otta müsia kaa'ula. Ka'akasü süle'e, süpana, süsoso, saa'in, so'oroloin, süliipütche, sumüchetse jee sü'wüi.[1]
Saainjiapala tü juriichikalü[anaataa | anaatawaa suurala]
Palajanaa, o'lojunusü süka wüin tü shiyülainka süpüla wuleinjatüin shia, tü süle'eka, otta müsia tü süwuikalü o'lojunusü jee ooijünüsü süka wüin ja'isü; o'yonojunüsü jouyuwai supushuwa'ale, süpüla sujuriichajünüin, süka saü'süka, eesü sujuriichajünüin süka seita, acheküsü sujuriichajünüin palajana tü susosoko, süpüla nnojoluin samantüinjatüin shia. O'yotunaka yootchon wuin shira süpüla ja'wawachoinjatüin tü süle'eka jee süwüi, mapa ejitünüsü ichii sheemetia. O'ulaanüsü sünain poolotüin shia. Motsopa shira, ajuriichijaasü shimüiwaa süka saüsüka. Tü maka ekünüsü sünain ja'in, müleka saamatüle shia, aseepüjaasü.[1]
Aainjünapü'üsü wane mi'iraa icha Maiko'u süpüla ee'iyatünüin tü shiküinka wayuu namüin na kamalainka amüin tü sukuwa'ipaka na wayuukana.[2]
Sai'wana tü juriichikalü[anaataa | anaatawaa suurala]
Ekünüsü jo shia sümaa wuiirü, yaja, areepa, ai, roo, püla'ana, piruuwa, kineeya a'lakajuushi. Eesia maiwanain shia. Sünain wane kottirawaa, alapajaa, e'itanüsü areepa a'ajaaushi, ai a'lakajuushi, otta müsia roo, sa'ato'u.